عيد الغطاس.. عيد النهر والهوية المصرية

يكتب محمود فرحات  

الثقافة الشعبية للمجتمع القبطي/ المصري هى ثقافة شعبوية لكل الاقباط ، وهى مش ثقافة دينية خالصه ولكنها ثقافه إتشكلت خلال عصور مختلفة من عقائد وثقافات مختلفة.. وهى بتمثل جزء مهم من تاريخنا وحياتنا اليومية.. فكل واحد مننا جواه وفى تكوين ثقافته حضارات متراكمة من عصور سالفة وحاضرة من العصر الكيميتي القديم والقبطى المسيحي والقبطي الإسلامى أثرت العصور دي مع بعضها على تشكيل تفكيرنا ووعينا

وعلشان الاقباط/ المصريين بيعيشوا بيوتهم جنب بعض منغير تفرقه مسيحين من مسلمين عايشين في بيئة قبطية/مصرية واحدة ومناخ واحد.. بياكلو من عيش واحد ويشربون من مايه نيل واحده.. فإن البيئة الواحدة دي هى اللي صنعت الموروث الشعبي المشترك ده..!!

علشان كده لما نقرا كتب المؤرخين بتوع زمان نلاقيهم بيقولوا ان الاقباط/المصريين كانوا بيحتفلوا بعيد الغطاس مسيحيين مع مسلمين في نهر النيل.. فنلاقي شيخ المؤرخين الاقباط/المصريين المقريزي بيقول..

(على مدار التاريخ المصري ، اعتمد المحتفلون المصريون بعيد الغطاس طريقة بديعة في الاحتفال ، عن طريق تزيين صفحة نهر النيل بمئات الشموع والمشاعل المزخرفة ، والخروج في مواكب حاشدة كُبرى قاصدين النهر ، في حين يُعرب الخليفة المصري عن سعادته غالبًا بتوزيع النارنج والليمون والسمك البوري والقصب)

ومن الحاجات اللي سابهلنا الموروث الشعبي الامثال الشعبية عن عيد الغطاس فنلاقي الشارع بيقول (غطستم صيفتم….) و(اذا غطس النصراني طلع الدفا الجواني) وكل الامثال دي بتدور حولين الدفا اللي بيجي بعد عيد الغطاس كما عبر عنها واستقر في وجدان التراث الشعبي القبطي/المصري

ولو دورنا هنلاقي في تاريخنا إن العيد دا ممتده جدورة لـكمت/مصر القديمه واللي عرفت عيد مشابه هو عيد الانقلاب الشتوى وكان المصريين بيغطسو فيه فى ماية النيل والمعتقد انه كان بمناسبة حرت الارض و نتر البذور ويمكننا تصديق الروايه دي في ظل كلام المقريزي اللي فات وطريقة احتفال المصريين في نهر النيل..!! 

لكن السؤال هو ليه المصريين دلوقت نسوا اللي كان جدودهم بيعملوه؟؟ نسوا احتفالهم المشتركة وبقا عندهم حاله عداء مجتمعية ضد بعض؟؟ وبقا المجتمع بيتصنف مسلمين ومسيحين وغيرها من التصنيفات؟؟ منين جابت الاجيال الحاليه كل حاله عدم التسامح دا؟؟ وليه قرر الاقباط/المصريين التخلي عن هويتهم المصرية ولصلح مين..؟؟

محتاجين نجاوب مع بعض على الاسئله دي..؟؟؟؟

وكل سنه والاقباط/المصريين/الكميتين بخير وسلام ومحبه وعيد غطاس سعيد علينا كلنا

Print Friendly, PDF & Email
This entry was posted in Egyptian History مصرنا, محمود فرحات and tagged , , . Bookmark the permalink.