!اللي عطاك يعطينا يا ساويرس

في الفتره الأخيرة كترت اوي البوستات علي الفيس بوك اللي بتتكلم عن ثروات الفنانين ورجال الأعمال، صور لبيوتهم وكلام عن حجم ثروتهم، والتعليقات كلها بتبين اد ايه احنا فعلا فقدنا الدين والإنسانية، نصيب الأسد من البوستات دي رايح لآل ساويرس، نجيب اخد طيارته الخاصة وراح اكل في بيروت ورجع، سميح عنده 17 ميار دولار،نجيب كل ثانيه بيكسب عشروميت مليون دولار، بااااااس في ايه مالكم؟

بجد انتوا مالكوا؟

افتكر من حوالي 20 سنة اختي اتخرجت من الجامعه وجالنا تليفون ان عندها انترفيو في شركة جديدة اسمها موبينيل،

وقتها كان معاش ماما 400 جنيه وكان اكبر موظف في الحكومة مرتبه 700 جنيه، اختي عملت الانترفيو واتقبلت وقالولها المرتب 2500 علي ما افتكر ده كان مرتب خيالي في الوقت ده، ولان احنا الحمد لله مش محتاجين الفلوس فمرتب اختي تحول لمصدر سعاده ليا انا تحديدا، لكوني اخر العنقود السكر المعقود، كانت اختي صارفه كل مرتبها عليا بصراح، لبس وفسح وشوكلاته.

بعد كام شهر لقيتها بتقول وزعوا عليهم 20 الف profit share متخيلين يعني ايه مبلغ زي ده لموظفة حديثة التخرج؟

وده كان حال كل موظفين شركات اوراسكم في وقتها.

نيجي بأه للجونة، الجونة اللي في كل زياره ليها بدعيلهم،مدينة جميلة متكامله الخدمات قدروا يحطوها علي خريطة العالم بشكل مشرف، بالرغم باني مش من سكانها إلا اني واقعة في غرامها.

تيجي انت بأه تقعد تقول بص عندهم ايه ومعاهم ايه، اه عندهم فلوس، بس عندهم قبلها نجاح، نجاح لانهم قدروا يبنوا منظومة عمل عادلة، فيها الموظف هو رقم واحد.

من الاخر آل ساويرس بيدلعوا موظفينهم بيفرحوهم بيخلوهم يحبوا الشغل ويتمسكوا بيه، يعني انا نفسي عمري ما اشتغلت معاهم ومع ذلك كنت من المنتفعين منهم من خلال اختي !

ولو انت شايف ان ربنا مديهم ال 24 قيراط كلهم، فروح حاسب ربنا متحاسبهمش هما، لأن ببساطة ممكن ربنا مش مديك لانك باصصلهم  وباصص لابن عمك اللي شقته علي البحر وابن خالك اللي جاب فيلا في التجمع وبنت اخو مراتك اللي اخدت بطولة السباحة، باصص لكل الناس إلا نفسك وشغلك، اشغل نفسك بنفسك مش بالناس.

فكر في نفسك وطورها ومفيش مانع في النص تقول “الليعطاك يعطينا يا ساويرس”

Print Friendly, PDF & Email
This entry was posted in هبة مأمون and tagged , , . Bookmark the permalink.