ولسه رمضان عايز يتعالج

احمد الحصري  

حوار وجودى فلسفى :

1-جاء رمضان علينا كأنه سيدنا الخضر،, الدنيا حلوة كلها فلوس والكل مبسوط.

 2-ده كان امتى يامحمد.

 1-النهاردة ياجاحد دول 3 جنيه بحالهم على بطاقة التموين.

 2-طب والرز.

 1-ده انت طماع قوى مش عارف انه بره التموين من الشهر الكريم اللى الرز فيه مكروه، مش انتم اللى قعدتوا تقلسوا على الرز السعودى والخليجى، كلوا بقا مكرونة واحشوا الكرنب والبدنجان والكوسة منتجات سيدنا سلمان.

قطع :

وزير تموين مبارك مش واخد باله ولا حد من وزراء السيسى فى دماغه، ان فيه ناس مش لاقية تحشى حلجة فى اى حاجة، طب فين الصب اللى فى مصلحة المواطن، شكلها بقت مسخرة.

تصريحات :

1-وزير النقل يرفع اسعار المترو على نص شعب مصر فى 3 محافظات و5 مليون داخلين طالعين بيخلصوا مصالحهم ويقول عدالة اجتماعية.

2-وزير الكهرباء مش شايف الفاتورة بتاعة الغلابة بينما يعفى كل رجال الاعمال،, والمرء على دين خليله.

3-وزيرة استثمار شغالة اقتراض على ابوه، ويطلع علينا محافظ البنك المركزى يتفتشخر بالاحتياطى النقدى، اللى كله كله قروض وودائع اجنبية بينما الدين الداخلى تعدى 3 تريليون.

4-محافظون وهم ليس اسما على مسمى وهم محافظين على كراسيهم، وطظ فى البلاد كأنهم تلاميذ مهدى عاكف.

شوية دروشة، الشهر الكريم بدأ.. ذلك الشهر الذى قال عنه الله فى كتابه العزيز : شَهْرُ رَمَضَانَ الَّذِيَ أُنزِلَ فِيهِ الْقُرْآنُ هُدًى لِّلنَّاسِ وَبَيِّنَاتٍ مِّنَ الْهُدَى وَالْفُرْقَانِ (185) سورة البقرة. ورغم ان الشهر هو شهر عبادة وطاعة وعمل وتكافل، لكن شعبنا الجميل حوله الى شهر هرى ومسلسلات واكل وشرب وعزومات وتظاهر كاذب بالتقوى والحرص على صلاة التراويح لتبدأ بعدها اى مسخرة،, ويمارس الفاسدون فسادهم والمسئولين كذبهم ويتوقف اى عمل اوانتاج بحجة الصيام.

يأتى الشهر الكريم مثل كل عام لم يتغير،, ومصر تعيش موجة غلاء لم تشهدها من 30 عاما ارتفع معدل التضخم السنوي في مصر إلى مستوى قياسي جديد، عند 31.7 في المئة، وذلك وفق بيان لجهاز التعبئة العامة والإحصاء وبقى كلام قديم، نحن نضاعف الغلاء كل سنة وده تقدير ضعيف لما يعرفه المواطن المصرى اللى مش عارف يقرا كلمة كومباوند اهل القمة.

فى نفس التوقيت ترفض الحكومة وتعترض على زيادة المعاشات الذين دفعوا عمرهم من اجل بلد اسمه مصر،, بينما لاتجد تلك الحكومة ونظام الرئيس اى غضاضة فى دفع مليارات من اجل عيون الوزراء والنواب والدبلوماسيين اللى مالهموش لازمة، وكمان باثر رجعى من 2015.

ونكاية فى الجميع يصل اجر الفنان عادل امام 60 مليون جنيه وعمره مادفع مليم لحد، وده حقه هو عارف انها بلد حرامية يدفع على قد ماياخد اضعاف، وده غلبان زى ماقال فى شاهد ماشفش حاجة امام مليارات النخبة والجنرلات المشاركين فى كل مشروع على بر مصر.

اما هرى الاعلانات فلا يتوافر الا رقم واحد من العام قبل الماضى لحجم الاعلانات على الفضائيات بنحو كام رقم فوق المليارات وده كلام فارغ جنب اللى متوقع ان يتضاعف عدة مرات هذا العام. وتأتى فتاوى المشايخ التى تجد كل الرواج فى الشهر الكريم،, وسنستمع مرة اخر الى كلام مكرر على كل السنوات الماضية حول مفطرات الصيام و مفسدات الصيام وهل المباشرة والإنزال والإستمناء مفطرات للصائم والمداعبة في رمضان وما حكم مداعبة المرأة لذكر زوجها في نهار رمضان والحكم الشرعي للجماع في رمضان وحكم تقبيل الزوجة من الفم في نهار رمضان وفتاوى رمضانية للمتزوجين وفتاوى حول العـادة السرية وفتاوى نسائية رمضانية وفتاوى للصغار في رمضان ومسائل في تتبع القراءات الحسنة في التراويح ومسائل في عدد ركعات التراويح. وفى التراويج ستجد الشوارع المغلقة والميكروفونات المفتوحة على البحرى،, وستجد كل المفسدين والفاسدين والمحتكرين للسلع والخدمات وستجد كل المسئولين،, وفى الصباح ان لم يكن بعد الصلاة مباشرةيعود كل الى ممارسة الغش والكذب ومص دم الشعب المصرى. ونأتى الى مسك الختام حيث يتوقف الموظف المصرى عن العمل طوال الشهر الكريم.

فى دراسة الاستاذة منى القصاص، مدرب إدارة أعمال وتنمية بشرية، أن الموظف المصري فاقد لأدنى معاني التركيز، والجد في العمل، مشيرة الى أن 50% من ساعات عمله تُهدر في تصفح مواقع التواصل الاجتماعي، والحديث مع أصدقاء العمل، فضلاً عن قضاء الاحتياجات الشخصية والمنزلية داخل مقر العمل، علاوة على أن منظومة العمل ينقصها الجزء الأهم بها وهو الرقابة وتفعيل طريقة العقاب والثواب على أسس وضوابط محددة….وكان اتحاد تنمية الموارد البشرية في مصر قد قال فى دراسة 2015 أنّ معدل إنتاجية الموظف الحكومي… لايتجاوز 25 دقيقة، ده فى العادى فما بالك فى رمضان.

وسيبك من بحث اليابانيين اللى قالوا انهه 13 دقيقة.

ورغم كل المذكور اعلاه دعونا نحتفل مع الرائع محمد عبد المطلب بأجمل اغانى رمضان : رمضان جانا

وفرحنا به

بعد غيابه

وبقاله زمان

غنوا وقولوا

شهر بطوله

غنوا وقولوا

اهلا رمضان

رمضان جانا

اهلا رمضان

قولوا معانا

اهلا رمضان

بتغيب علينا وتهجرنا وقلوبنا معاك

وفى السنة مرة تزورنا وبنستناك

من امتى واحنا بنحسبلك ونوضبلك ونرتبلك

اهلا رمضان جانا قولوا معانا اهلا رمضان

رمضان جانا اهلا رمضان

قولوا معانا اهلا رمضان

يوم رؤيتك لما تجينا زى العرسان

نفرح وننصب لك زينة اشكال والوان

فى الدخلة نبقى نطبلك ونهللك اه ونقولك

اهلا رمضان جانا قولوا معانا اهلا رمضان

رمضان جانا اهلا رمضان

قولوا معانا اهلا رمضان

يا مسحراتي دوقلنا تحت الشباك

سمعنا وافضل غنيلنا للفجر معاك

واعملنا هوليلة تلاتين ليلة حلوة جميلة

اهلا رمضان جانا قولوا معانا اهلا رمضان

رمضان جانا اهلا رمضان

قولوا معانا اهلا رمضان

رمضان جانا وفرحنا به بعد غيابه

وبقاله زمان

غنوا وقولوا شهر بطوله

غنوا وقولوا اهلا رمضان

رمضان جانا اهلا رمضان

قولوا معانا اهلا رمضان

بجد اهلا رمضان وربنا يعافيك بسرعة ونتقابل بعد العيد الصغير والكبير، ونكون فى ضيافة الرحمن.

Print Friendly, PDF & Email
This entry was posted in Egyptian Affairs شؤون المحروسة, احمد الحصري and tagged , , . Bookmark the permalink.