لعبه…القطه والسمكه

نانسي عادل  

هو عايزها قطه مغمضه و هي عايزاه مقطع السمكه و ديلها تناقض غريب و المهم بقي ان لا القطه دي بتبقي فاهمه يعني ايه حياه و بيت و زوج و اسره و لا بردو زير النساء دا بيبقي فاهم حاجه و طبعاً كلامي عن التفكير في المجتمعات الشرقيه في  اغلب  حالات الارتباط.

و طبعاً الحالتين بيعانوا زي بعض من مرض ساعد في ترسيخه المجتمع المختل،اللي بيروج لأمور بعيده تماماً عن الصح، دي حتي بعيده عن الدين و الاخلاق اللي هو بيدعي طول الوقت انه محافظ عليهم.

كان ليه قريب بيدور علي عروسه، و طبعاً من ضمن مميزات فتاه احلامه أنها تكون لا خرجت و لا سافرت واتغربت ولا ليها تجارب فى الحياة عايز واحده كانت من البيت للمدرسة ومن المدرسة للبيت.

و كان عايزها صغيرة سناً وتكون خام وعجينة سهلة يشكلها زى ما هو عايز، و بالمره جميله و اَهلها يوفقوا علي امكانياته و كمان يجهزوا معاه كويس.

و طبعاً هو كان مقطع السمكه و ديلها.

المهم انه هو هو الشخص دا رجع يشتكي منها انها مش فاهمه احتياجاته كراجل  و مش مختبره الحياه و لا عارفه ازاي تجامل حتي اهله اما يجوا بيتهم او تربي اولادها تربيه سليمه.

و هي هي البنت اللي قبلت بيه كفارس احلام محصلش، و بنات كتير جريت وراه و هي المحروسه اللي فازت بيه فالنهايه.، هي كمان رجعت تشتكي منه انه بيطالبها بأمور صعبه عليها كبنت اتربت تربيه محافظه و بداءت كمان تشك انه بقي له علاقات زي ما كان زمان.

الخلاصه...

بلا قطه مغمضه بلا مقطع السمكه

البنت اللي راحت و جت هي الأقدر على تربية أبناء خاصة في الأيام دي اللي نفتقر فيها لثقافة التربية الحقيقية فهي خرجت وتعملت وعملت وشاركت فى الحياة الاجتماعية فاكتسبت خبرات تؤهلها لان تكون صديقة لزوجها قبل أن تكون زوجة وصديقة لأبنائها قبل ان تكون ام

فهي الأقدر على التعامل مع متغيرات هذا الزمن.بعكس الخام المغمضه.

 و في المقابل محدش قال ان الراجل اللي راح و جه و عرف ستات و بنات و قطع السمكه و دي ديلها، هو دا الشريك اللي هيبقي زوج مثالي و اب رائع بالعكس في اغلب الأحيان بيكون اخد علي تعدد العلاقات و انسان شكاك.

و لو حد هيقولي لا دا بيبقي واعي و فاهم يبقي  فالمقابل بيحوا العلاقات للبنات انطلاقاً من نفس المبدأ و انها هتكون زوجه مرضيه و فاهمه.

Print Friendly, PDF & Email
This entry was posted in نانسي عادل and tagged , , . Bookmark the permalink.