النقد.. حاجة مؤلمة .. فيعني ايه حد يعيب في حاجة فيا او يوجه لي نصيحة ؟! فمين ده اصلاً ؟

 كيرلس بهجت              كيرلس بهجت                

الموضوع بيبتدي من و أحنا صغيرين , لما بنسمع اول نقد في حياتنا من بابا او ماما .. و اللي غالبا بيكون مصحوب بصيغة غضب و اي شكل من اشكال التعنيف .. و اللي بيترجم في دماغنا ان ده مؤشر علي بداية كسر العلاقة الحلوة اللي بتربطنا باهلنا الـ attachment bond .. فساعتها بنحس أننا أقل من العادي و إن حياتنا و سعادتنا مهددة للإختلال .. فبيتكون عندنا إن الـ ” نقد ” ده حاجة وحشة ! و إن مجرد التعرض ليه مره تانية ممكن يخلينا نمر بنفس الأحاسيس السلبية ديه ..

واحدة واحدة نبتدي نكبر و شخصيتنا تطور و يختلف نظرة كل واحد فينا للـ ” نقد ” , فيظهر الـ Internalizer و ده اللي بيتعب من اي صيغة للنقد , و يفضل يعذب في نفسه و يكون حينفجر لو حد لمح له علي اي حاجة في شخصيته او حياته !! .. و يظهر برضة الـ Self-Convincer و اللي ضيقه بالنقد بيخليه متضايق و مخنوق بس ده مش بيطلع في شكل ضيق من الذات قد ما هو هجوم علي الأخر بشكل عنيف , فهو مهما كان في ايه هو مقتنع تماما باللي بيعمله , فالاخر مش بيفهم عشان بينقده ! …

فيه الـ Defender و اللي بيكون سلوكه مدافع بس في النطاق الطبيعي , يعني بيدافع عن شكله و وضعه بس حالته مش بتتعدي شكل الدفاع البسيط ده .. و فيه الـ Feedback Seeker اللي الي حد ما بيتعامل مع النقد بشكل موضوعي و عملي و بيركز مع النقد كإشاره معينة عشان يتطور و يحسن من سلوكه ..

المشكلة إننا ساعات في حياتنا بنقابل ناس عشان عندنا شعور شديد بالنقص فبتعوضه بنقدها المستمر للي حواليها , فلو أنتا من الشخصيات اللي بتتعب و تتعصب من اي نقد حتلاقي حياتك بتتحول للجحيم , و عشان كدة من اشد علامات نضوج الشخصية هو تعاملها مع النقد بشكل عابر و سلس .. حد ما قال كلام ما فديه وجهة نظره هو حر فيها , ممكن تكون غلط و ساعتها حتضرني في حاجة لو سمعتها و ممكن تكون صح فتساعدني اني احسن من نفسي ..

في النهاية الإنسان اللي عنده إمتلاء حقيقي بذاته مش بيفرق معاه مين قال ايه او مين أتكلم ازاي .. فنظرته لنفسه مش معتمدة علي شكل هش سطحي معتمد علي اراء أو ادراكات اللي حواليه .. أنما نابع من إيمانه بمواطن قوته و صدق جوهره .. و يبقي زي ما قال عمنا ” أحمد بهجت ” في (تفاحة أدم ) :

( .. ان القوة ان يعرف الانسان ماذا يقال عنه ثم لا يهتم ,, اما الضعف فان ينأى بنفسه عن كل نقد ويحسب انه قد أفلت من النقد .. )

Print Friendly, PDF & Email
This entry was posted in كيرلس بهجت and tagged , , , . Bookmark the permalink.