التطهير

كيرلس بهجت       كيرلس بهجت           

في سلسلة افلام اسمها the purge ( التطهير ) بتحكي عن تصور خيالي بيحصل في أمريكا و هو ان الحكومة الأمريكية بتقرر تعمل مناسبة سنوية اسمها ” التطهير ” لمدة 12 ساعة يكون الهدف منها التخلص من الشحاتين و الفقرا و الزنوج و الناس اللي بيتم تصويرهم دايما انهم عاله علي المجتمع او طبقة اقل من البشر , و يكون الهدف مش مجرد التخلص من الناس الغير مفيدة ديه بس , لا ده كمان لتفريغ اي مشاعر غضب عند الاغنيا و الطبقة الاعلي في العنف و القتل تجاه الناس ديه !! و فعلا لما بتبدي عملية التطهير بيبقي من حق اي انسان يعمل اللي هو عاوزه في اي انسان تاني من غير ما يكون في سلطة للقانون عليه , يعمل اي حاجة مادام هو الاقوي و الاشرس او علي الاقل معاه فلوس تخليه يحمي نفسه و يشتري سلاح يعمل بيه اللي يتمناه ! .. و تكون امريكا في اليوم ده زي الغابة حرفيا !!

الفيلم ده علي قد ما هو مش مصنف من افلام الرعبة التقيلة في السنيما الامريكية , إلا انه في وجهة نظري من اشدها رعب و ذعر في تاريخ التخيلات النفسية .. فمجرد تخيل السماح للانسان بالتصرف وفق طبيعته او غريزته من غير اي رقيب او عواقب فكرة جديرة انها تهدد اي سلام شخصي او أمان مجتمعي .. فهل مجرد اللي بيحمينا من الشر الانساني هو القانون بس ؟!! فهل من غير ضوابط مجتمعية مسيطرة كنا حنتحول لغابة ؟! فهل الطبيعة البشرية فاسدة للدرجة المفزعة ديه ؟! .. فللاسف الاجابة اللي بيقدمها الفيلم و بتتشارك معاه ادلة الواقع .. اه فاسدة ..

فالخير ليس الا محاولة مستمية من الشخص لكبت و كبح الفساد الانساني ده , صراع داخلي بيحاول فيه الفرد التغلب علي لذة الشر و متعة التدمير ! فأنهي ألذ اني اقتل و اغتصب و لا اسامح و اسمو ؟! طبعا لذة الشر اقوي بكتير من رتابة و ملل الخير .. حتي و لو رفضنا الاعتراف بكدة إلا إن متعة سادية القتل و شهوة الأغتصاب احلي بكتير !! ,,

فالتوشهات و الظلال النفسية اللي عايش فيها كل فرد خلت من البشرية كهف مظلم للاسقاطات و الانحرفات السلوكية .. خلت الطبيعة الانسانية حتي و لو كان سطحها كلمة حسنة او مشاعر رحيمة , إلا انها في اعماقها في عقد و نقص .. في سادية و عنف .. في غريزة حيوانية عمالة تنهش في قلب و فكر الانسان ! ..

فمن النفاق و الزيف اننا ندعي ان الخير هو الأصل في ظل وجود اجبار قانوني علي فعل الخير .. ففي الاغلب بيبقي الخير الانساني مجرد عدم قدرة أو عجز عن اظهار اسرار و خبايا النفس ذاتها ..

فالفساد هو الاصل و الصلاح هو التحول ..

Print Friendly, PDF & Email
This entry was posted in كيرلس بهجت and tagged , , , , , , . Bookmark the permalink.