فانتازيا الصراع بين الأبيض والأحمر

 محمود فرحات محمود فرحات

من البداية الموضوع دا كله موضوع فكاهي هزلي وان كان يحتوي على حقائق تاريخية وفكرة اتت من الصراع بين الابيض والاحمر سواء في الماضي بين ملوك الشمال وملوك الجنوب او في الحاضر على المستطيل الاخضر .. فالصراع بين الابيض والاحمر هو صراع دائم ومستمر في مصر منذ اقدم العصور وحتى يومنا هذا وان اتخذ اشكال مختلفة ومتنوعة .. ومش هنبعد كتير من زمنا دا وانما هنرجع بس لسبعه الاف سنه ورا ونشوف اية الموضوع بين الابيض والاحمر من ايام جدودنا المصريين القدماء ولغاية عصرنا الحالي

 المشهد الاول

انتصار ملوك الجنوب والتاج الابيض على ملوك الشمال والتاج الاحمر

الحكاية تبدأ من ايام العداء الذي مزق مصر الى قسمين قسم شمالي ليهم تاج احمر ورايات حمر .. وقسم جنوبي ليهم تاج تاني ابيض ورايات بيض .. الجنوبيين بتوع التاج الابيض كانوا بيعتبروا نفسهم الملوك الشرعيين لمصر وان اهل الشمال بتوع التاج الاحمر ما هم الا غرباء احتلوا اقليمها الشمالي واشاعو فية الفوضى والشر .. وانهم مش مصريين لان المصري لازم ينتمي للراية البيضاء راية الجنوبيين .. فقرر ملك الجنوب ذو التاج الابيض وهو الملك العظيم مينا استرداد حق الراية البيضاء ونصرها وتوحيد ابناء مصر تحت راية  واحدة هيا الراية البيضاء والتاج الابيض .. واقتلاع الراية الحمراء من ارض مصر الغالية  .. وكان له ما اراد فأنتصر على اهل الشمال الحمر واقتلع رايتهم الحمراء من ارض مصر .. واصبحت مصر كلها بيضاء وعلشان يثبت انتصارة دا لبس التاج بتاعهم رغبة في اذلال وهزيمة رؤسائهم.

 المشهد الثاني

الصراع بين انصار ست الحمر وانصار حور البيض

المشهد التاني بيدور في الاساطير المصرية والحكايات بين واحد اسمة ست اتخذ من اللون الاحمر والنار والسلعوه رمز له .. وواحد تاني اسمة حورس اخد من الابيض راية له الصقر رمز له .. والحكاية بتدور حولين ان ست قتل ابو حور اللي اسمه اوزيريس .. ودا من حقدة علية ولما جة حورس للوجود قرر الانتقام لمقتل ابوة من زعيم الحمر الستاوين .. فجمع اعوانه من الحوراوين البيض .. ودخل الفارس الابيض المعركة الحاسمة بين الخير والشر بين الابيض والاحمر .. واستطاع قتل ست و أخد بتارة واصبحت مصر حوراويه بيضاء  

المشهد التالت مينا

الصراع الكروي بين الزمالك الابيض والاهلي الاحمر

فى العصر الحديث اصبح هناك صراع من نوع جديد وهو الصراع الكروي بين الاحمر والابيض .. وهو نفسة الصراع الذي دار على ارض مصر من زمان .. ولكن الادوات اختلفت وبقيت كورة .. والدليل على استمرار الصراع القديم هو ان البيض خلوا شعارهم ابيض وفية رامي مصري قديم يحاول اصطياد احفاد ست الاحمر .. ورغم ان انصار الابيض والاحمر لازالوا في صراعهم .. الا ان موازين القوى اختلفت فالاحمر الذي ولد مجهول الهويه وعاد للوجود بعد اقتلاعه من ارض مصر .. واتخذ شعار الصقر هذة المرة حتى يضلل المصريين ويخدعهم بكونه هو حورس الابيض القديم .. اصبح هو الان صاحب اليد العليا في الصراع وقد دخل الصراع ايضا اطراف اخرى غير الابيض والاحمر .. فاصبح هناك الاصفر الصديق الصدوق للابيض والاخضر والازرق واخلطت الالوان لكن عودة الابيض الى مسرح الصراع بعد ابتعادة عنه اكيد .. لان الزمان يعيد نفسة وكما كان اجدادنا يمثلون حكاية حورس وست ويتصارعون في حروب دامية بين الشمالين الحمر والجنوبين البيض .. ودائما كتب للبيض النصر فيها .. فسيعود الابيض وينتصر وستبقى راية الحوراوين باقية عالية

 وزي ما قولتلكم الموضوع كله فانتازيا وهزل  .. إنت بقى حوراوى زملكاوي ابيض ولا سيتاوي اهلاوي احمر؟؟

This entry was posted in Egyptian History مصرنا, محمود فرحات and tagged , . Bookmark the permalink.