عزيزي الرجل… تخيل نفسك ست لمده خمس دقائق

أماني جودة  اماني جودة

بيتهيالى المجتمع العربي مش هايفهم غير لما الراجل يتحط في نفس ظروف الست لما يتولد يتعمله عقيقه نص عقيقه البنت ولما يكبر شويه يقولوله خواصك البيولوجيه هاتمنعك تصلي وتصوم وتمسك المصحف وتدخل الجامع لمده معينه في الشهر عشان ﻻزم تكون طاهر وانت حاليا نجس وناقص دين ونختنه عشان لما يمشي والهدوم تحتك باعضاءه التناسليه مايهيجش ويفكر ف الحاجات الوحشه وبعدين نقوله انت ابتديت تبقي فتنه والستات لما تشوفك هاتريل عليك ف كل شعرايه هتبان منك هاتوديك نار جهنم ونلفك في طبقات عديده من القماش عشان نأمن شرك على المجتمع.

وياريت بقي لو تقعد في البيت خالص ماتخرجش الا لضروره وماتتكلمش مع اى ست الا لضروره عشان حتى صوتك عوره ومش مهم تشتغل خالص ويكون لك قيمه قيمتك في بيتك كده كده الستات قوامين عليك وهايشتغلوا احسن منك ومتحاولش تبقي قاضي او رئيس حي حتى، ليه؟ لان انت عاطفي وناقص عقل ومش معقول هايبقي لك منصب تمشي فيه الستات وراك مش هزلت للدرجه دي يعني والست لما تغلط تشتم تشرب سجاير شيشه بانجو تصاحب 100 راجل وتنام معاهم ده عادي لكن انت شرف امك واختك وكل غلطه هاتتحسب عليهم عشان كده من حقهم يتحكموا فيك عشان الناس ماتاكلش وشهم ولما تتجوز عيب الناس تعرف اسمك عشان انت واسمك عوره ف مراتك هاتقول عليك الجماعه وبعدين ماينفعش تقول لمراتك اذا طلبتك للجنس ﻻ عشان الملايكه قاعدينلك يشوفوك لو وافقت وانت حاطط الجزمه ف بوقك يبقي انت كده تمام لو ماوافقتش هايفضلو يدعو عليك للصبح مﻻيكه فاضيه بقي ماوراهاش حاجه ونفس الملايكه هايعملوا من بنها لو انت طلبت الجنس وهى قالت ﻻ ﻻن ده واجب عليها كل اربع شهور مش شغلانه هي.

 اما بقي لو الجنونه طقت ف دماغك يبقي ليها الحق تضربك على فكره ﻻن من واجبها تاديبك واوعى تنسي ان حقها تتجوز عليك مثني وثلاث ورباع لكن ماتخافش هانلزمها بالعدل بينكو جميعا في المبيت ، المبيت بس خلى بالك مش الجنس لو معترض راجع بند ال 4 شهور وبعدين انت زعلان ليه طول ماهى عارفه تصرف وتقدر تفتح بيت يبقي انت ماتفتحش بوقك اما بقي لو لاقدر الله وطلقتك يبقي استني 3 شهور على ماتتجوز تانى ولو كانت دي اول او تانى طلقه ف انت تقريبا في عصمتها لحد ما العده تخلص ترجعك بقي او ترميك هى حره اما لو هى ماتت وربنا ريحك منها ﻻ معلش هاتستني ع الويتنج 4 شهور وعشره عشان احنا دخلنا نيتك وانت اكيد زعلان ومقهور ف البس اسود واتحبس ف البيت وامتنع تماما عن الزينه حتى لو كانت شويه كولونيا اما هى بقي لو ربنا خدك من حقها تنام مع واحد شارياه من السوق قبل ماتتدفن انت … ومش مشكله تحضر جنازتك.

ولما ابوك يموت هاتاخد نص ميراث اختك ولما انت نفسك تموت ديتك هاتبقي نص ديه اختك ولما تروح الجنه مراتك ليها 72 راجل تنام معاهم ف اقعد استني دورك بعدهم بقي والتزم بالطابور ده لو دخلت الجنه يعني اصل احتماليه دخولك الجنه ضعيفه جدا عشان اغلب اهل النار من الرجاله هايبقوا متعلقين من شعرهم واعضائهم عشان حطوا برفان وهم خارجين مثلا لبسوا بنطلون او مشيوا متبرجين ودماغهم مكشوفه المهم انهم اتعذبوا بسبب قله ادبهم ونشر الفحشاء والمنكر بين الناس.

اما بقي لو حاولت تدور على عقوبه مغلظه لجريمه الاغتصاب مش هتلاقي ليه لان الراجل هو سبب الفتنه في الاساس فغالبا هو اللى استفزها وفي الاخر هنرجع نقول ياه شفت ربنا كرمك ازاى

Print Friendly
This entry was posted in Isis' Daughters بنات إيزيس, أماني جودة and tagged , . Bookmark the permalink.