قرطاس البكالوريوس

د.عمرو أحمد  عمرو أحمد

النجاح في الثانوية العامة هو مفترق طرق حقيقي يعني ياعزيزي الطالب الناجح أنت لِسَّه مانجحتش ولاحاجة.. ايوة فعلا..اللي انت عملته ده مش نجاح ف ماتحاولش تضحك على نفسك وتفتكر انك وصلت للمرحلة دي لان النجاح في اختيار طريقك بعد الثانوية العامة هو الأهم واللي فات ده حاول تنساه بسرعة..وأحب أفكرك بمشهد حزلقوم مع الظابط سراج في فيلم لاتراجع ولا استسلام وهو بيحاول يعلمه سواقة العربية لما سأله عن اذا كان بيعرف يسوق ولا لا ورد عليه بانه مش متأكد.. ده معناه ايه..؟

معناه لو انت مجموعك كبير ماتدخلش طب عشان مستخسر تدخل بالمجموع ده اداب أو تجارة او حقوق.. ادخل كلية بتحبها هتتفوق فيها و هتتفوق في مجال عملك بعد كده.. ماتدخلش طب وتقول مش ممكن أبقى دكتور كويس..لو انت مجموعك كبير ماتدخلش طب بيطري وانت بتخاف من الفرخة.. ماتدخلش طب بيطري عشان مالحقتش صيدلة.. ماتدخلش بيطري عشان تشتغل في شركة أدوية..الكلية دي خازوق كبير لو ماحبتهاش هيبقى بينك وبين الحياة كره كبير مفيش أمل انه يتحًول لحب.. حياتك هتدمر.. بلاش منها خالص..ماتروحش تجري ورا صيدلة وفاكر انك هتبقى عالم.. كلنا عارفين كويس انك لو ما اتعينتش في الكلية هتقف في صيدلية تبيع بامبرز وشامبو والويز او تشتغل مندوب في شركة أدوية وماادراك ماهو المندوب.. مهنة مش سهلة ومحتاجة قدرات خاصة..

ماتدخلش تمريض وانت معندكش استعداد تكون إنسان حقيقي.. ماتدخلش تمريض لان المرضى محتاجين حد يديهم أمل في الحياة.. مش رغبة في الموت لما يشوفوا خلقتك..ماتروحش تدخل زراعة عشان تاخد لقب مهندس.. لأنك ممكن تاخد على قفاك وماتطلعش اساسا من الكلية...ماتدخلش تربية وانت معندكش اخلاق مربي الأجيال.. التعليم مش ناقص فساد..بالنسبة للبنات المحجبات.. ماتدخليش كلية لاتتناسب مع الحجاب يعني اداب مسرح ومعهد فنون مسرحية وفنون جميلة هتحسي انك غريبة فيهم بالنسبة للبنات المنقبات… ماتدخليش أي كلية لا يتناسب مجال عملها مع زيك يعني فكري كويس لأنك هتلاقي صعوبة كبيرة..

بالنسبة بقى للي مجموعهم صغير ودوّل احسن ناس بجد.. ماتفتكرش انك جبت مجموع صغير عشان غبي لا انت بس قدرتك على الحفظ مش زي ابو مجموع كبير وده مالهوش علاقة بالذكاء.. انت احسن واحد ممكن يلحق نفسه..! اتعلَّم صنعة بتحبها واتعلم كمبيوتر ولغات وسيبك من قرطاس البكالوريوس واعمل مشروع ووفر علي نفسك اربع سنين من وجع القلب.. لو ماسمعتش نصيحتي مش هاقول انك حمار لأن الحمار محدد هدفه وعارف هو بيعمل ايه.. لكن انت هتكون أسوأ من الحمار لما تكون داخل كلية عشان تاخد قرطاس بكالوريوس وبعدين تبدأ تدور هتعمل بيه ايه.. !

ساعتها الحياة وحدها هيكون عندها حل واحد للي ممكن تعمله بالقرطاس..

Print Friendly, PDF & Email
This entry was posted in عمرو أحمد and tagged , . Bookmark the permalink.