متى تكون مساواة

  داليا وصفى    شيشة مرأة تركيا           

أحد الأصدقاء قال لي: إيه المساواة التي بتدعي ليها؟ ما انتوا فعلا أخدتوا كل حاجة.. ياشيخة دا انتوا سبقتونا بالشيشة على القهاوي..

فكان ردي: وإيه المشكلة في شرب المرأة للشيشة على القهوة؟ ما الراجل بيشرب شيشة على القهوة؟ 

فرد: ايوه بس الشيشة مضرة والمنظر مش حلو.. واللي سايبها تشيش علني كده أكيد مش راجل..

ياعزيزي.. هي الشيشة مضرة للست بس ولا مضرة للست والراجل؟ ثم ان الموضوع قديم جداً.. ستات كتير طول عمرها بتشيش الفرق الوحيد انها كانت بتشيش في البيت لو كانت من طبقة معينة.. يعني انت لو عندك شيشة فالبيت ومراتك حبت تشيش معاك حتشيش صح؟

– صح بس فالبيت مش علناً كده.. صحيح ان لم تستح فأفعل ما شئت..

يعني وهي لما تشيش فالبيت رجولتك حتكون محفوظة وتمام إنما بره البيت حتكون اتبعترت؟ وتقولي في مساواه خلاص وكله تمام؟

لو في مساواه فعلا مكنتش عينك حتشوف ان اللي بيدخن الشيشة او غيره من الأفعال ست ولا راجل.. عينك كانت حتشوف الغلط بس مش جنس ونوع اللي بيعمل الغلط وساعتها تفتكر ان الشئ دا غلط..

المساواة تتحقق كده.. انك لو رافض لشئ ترفضه لأنه مضر للفرد وبالتالي للمجتمع مش ترفضه ﻷن الست هي اللي بتعمل الشئ دا.

ناس كتير جدا بتصنف الغلط غلط ﻷن اللي بيقوم بالغلط شخص مش على هواهم مش لمجرد انه غلط.شيشة مرأة قهوة

نفس الموضوع على التحرش.. وعلى أخطاء السواقة والحوادث.. وعلى الفشل التعليمي.. وعلى الفساد المالي او الإداري.. وعلى سوء تربية الأبناء.. لما يكون اللي غلط مش على هوانا عموماً ولما تكون مرأة خصوصاً نفتكر ان الشئ دا غلط.. غير كده مش بنقول دا غلط.. مش بنشوف انه غلط اساساً..

ومن هنا ممكن نفتكر المثل اللي بيقول حبيبك تبلعه الظلط.. ما هو أصل حبيبك دا ممكن يكون انت نفسك، ممكن يكون حد من فئتك العمرية او الاجتماعية او حتى نوعك الاجتماعي.

لكن اي حد خارج إطارك بيكون غلط ﻷنه برا إطارك.. مش ﻷنه غلط.

ضاعت مننا الحيادية لما بدأنا نصنف اللي أدامنا بناء على أهواءنا مش بناء على معايير الانسانية أو العقل..

المساواه مش انك تمسك في اي حاجة بتمارسها أنت بحرية وبدون نقد ولما غيرك يمارسها تنهره وتنتقده وترفضه اجتماعياً وترجع تقولي ما هو حر أهو وبيعمل اللي هو عاوزه..

اه بيعمل اللي هو عاوزه لكنه مستهجن ومهدد اجتماعياً على عكسك.. المساواه انكم انتم الاتنين يتم رفضكم او تقبلكم اجتماعياً على نفس القدر.. المساواه انكم انتم الاتنين يتم النظر لكم أو تجاهلكم بنفس الصورة..

المساواة انكم انتم الاتنين تكونوا إنسان مش واحد مصنف راجل حر لا لوم عليه في اي شئ والتاني مصنف مرأة تحت الوصاية ومسئولة عن نفسها وعنك وعن شرفك ورجولتك والمجتمع والأخلاق العامة وجيل المستقبل والطبيخ والتنضيف والغسيل والمكواة والأعراف والتقاليد والتراث والدين..

Print Friendly, PDF & Email
This entry was posted in داليا وصفي and tagged , , , , , . Bookmark the permalink.